Auf’m Tschamp1)
Mogst net amoi
aufegehn auf’d Oim, dosd’ sixt,
dos d’Kiah si gfrein
waunstas in Stoi eine ruaf’n tuast:
„Tschooch2), tschooch, kimm lei“?
Mogst net amoi
Blotan3) auf d’Händ hom, vom heign4),
oba dafia, zua Belohnung Heibischlan5) schmeckn6)?
Mogst net amoi
hinta da Hittn in d’Schwoazba7) geh
und in gonzn Nochmittog nua duat huckn,
rund umadum schaun…
und dia a blaue Zungan hoin?
Mogst net amoi
de Gummla onziagn
und mit’n Emarell8) im Nieslregn
Schwammalan suachn geh?
Mogst net amoi
am Beag aufekraxln, in da Mittogshitz
und am Güpfi ins Toi obaschaun und juchazn,
weu da is Heaz übageht?
Mogst net amoi
deine Fiaß ins uakolte Gletschabochwossa hoitn
und gspian wias nochand pricklt?
Mogst net amoi
auf d’Nocht in da Hittn sitzn
am oidn Tisch, wo olle Plotz hom,
nemman Kuchlhead, wo s’Hoizfeia brennt (riach amoi!)
und an uandlichn Kaisaschmoan oda Schlipfkropfn9) essn,
und mitanand no a Liadl singan?
Mogst net amoi
in da Nocht am Strohsock liagn
und hean wias winden tuat,
ummas Haus und in d’Bam?
Mogst net wenigstens amoi no
in’s Tschamp aufgehen, die Natua genießn,
bevua sa’s komplett eibetonian?
Ollaletzte Frog:
Mogst net amoi wissen
was a Kumpf10) is?
Elke Gaidatsch-Hamernik, 21. u. 22.8.2009
Gewidmet all jenen,
die hoffentlich noch die Chance haben,
echte Natur zu erleben
a Kumpf
_______________________________________________________________________________
Druckversion
Diese Seite weiterempfehlen